മനസ്സ്‌ കാട്‌ കയറി ...
ഒരു വെള്ള മയിൽപീലി തേടി...

പൂക്കൾ വിടരാത്ത 
ശലഭങ്ങൾ പിറക്കാത്ത മണൽക്കാട്ടിൽ
സ്നേഹത്തിന്റെ നിറമുള്ള മയിൽപീലി തേടി...

ചെന്നായയും കഴുതപ്പുലിയും
പതിയിരിക്കുന്ന നിഴൽക്കാട്ടിൽ
നന്മയുടെ മണമുള്ള മയിൽപീലി തേടി...

മനസ്സ്‌ കാട്‌ കയറി...

കണ്ടതോ ക്രൂരതയുടെ നിറം, ചിരിയുടെ
ആട്ടിൻ തോലിലൊളിപ്പിച്ച ചെന്നായയെയും
വഞ്ചനയുടെ നീലച്ചായം മുക്കിയ കുറുനരിയെയും മാത്രം...

കിട്ടിയതോ ഇരതേടി അലയുന്ന കൂമന്റെ,
ശവം തേടിയലയുന്ന കഴുകന്റെ,
ചതിയുടെ ചാരനിറമാർന്ന തൂവലുകൾ മാത്രം...

മനസ്സ്‌ കാടിറങ്ങി...
വെള്ള നിറമുള്ള മയിൽപീലിയെന്ന സ്വപ്നം നഷ്ടപ്പെട്ട്‌...
മനസ്സ്‌ കാടിറങ്ങി...